धनकुटाको चौबिसे गाउँपालिका र मोरङको केराबारी गाउँपालिकाकाबीच सीमा विवाद चर्किएको छ । खानेपानीको मुहानका विषयमा विवाद सुरु भएको हो ।
मोरङको केराबारी गाउँपालिका-२ जेफाले र धनकुटाको चौबिसे गाउँपालिका-८ को सिमानामा रहेको भालु खोलाको पानीको मुहानको विषयलाई लिएर सीमा विवाद उत्पन्न भएको हो । केराबारी गाउँपालिका फाइवा गाउँका स्थानीयले भालु खोलाको पानी २०५० सालदेखि पाइप मार्फत तानेर उपभोग गर्दै आएका थिए ।
पाइपका माध्यमबाट सिधै तानेर ल्याएको पानी २ सयभन्दा बढीले उपभोग गर्दै आएका छन् । २०७४ सालबाट भने सङ्घीय सरकारको सशर्त अनुदान र प्रदेश सरकारको लगानीमा व्यवस्थित रूपमा एक घर- एक धारा कार्यक्रम मार्फत केराबारी-२ फाइवाबासीले उपभोग गर्न थालेका छन् ।
